خارج من (سيتى ستارز ) المول الشهير،
السما شكلها كئيب ،السحاب شكلة كانة دخان سيجارة ،القبة الزرقا اللى فى مسجد
الشرطة خارج منها اذان صوتة حلو، قدامى راجل عجوز ماشى بعكاز باصص فى الارض
على طول ، لابس نضارة سودا وبدلة سودا برضة، بيقول كلمتين بس وبيغير
ترتيبهم ...الحمد لله ...لله الحمد
صممت امشى وراة مع انة ماشى بالراحة
جدا ،كنت بحاول اسمعة كان فية حاجة مريحة وقفنا على البوابة شوية كان فية
زحمة. سمعت سواق تاكسى بيحكى زكرياتة فى النصب قال لواحد ( ركب معايا تلاتة
حريم سورى !! قشطت اللى خلفوهم وانا امشى والعداد يمشى ولا هما واخدين
بالهم )
واحد تانى سواق تاكسى برضة مطحون واقف
بيقول تاكسى ؟ تاكسى ؟ ووشة مليان احتياج للمشوار دا شكلة فعلا غلبان
....قدام مول زى دا والناس اللى خارجة منة واللى واقفة قدامة سألت نفسى
ازاى فى فرق الطبقات دا فى البلد وجوة كل طبقة الفرق دا كلة؟ بصيت للسماء
الكئيبة وطلعت نفس طويييل ببص ورا لقيتة بيقول ..الحمد لله ...لله الحمد
No comments:
Post a Comment